ಕೇರಳದ ಚಾಲಕ್ಕುಡಿ ಪಟ್ಟಣದಲ್ಲಿ ವಿಚಿತ್ರ ಪ್ರಕರ

ಕೇರಳದ ಚಾಲಕ್ಕುಡಿ ಪಟ್ಟಣದಲ್ಲಿ ವಿಚಿತ್ರ ಪ್ರಕರ

ಕೇರಳದ ಚಾಲಕ್ಕುಡಿ ಪಟ್ಟಣದಲ್ಲಿ ವಿಚಿತ್ರ ಪ್ರಕರಣವೊಂದು ನಡೆದಿದ್ದು, ಅಪಾರ್ಟ್ ಮೆಂಟ್ ವೊಂದರ 18 ಮನೆಗಳ ನಳಗಳಲ್ಲೂ ನೀರಿನ ಬದಲು ಸಾರಾಯಿ ಉಕ್ಕಿ ಹರಿದ ಘಟನೆ ನಡೆದಿದೆ. ಸೋಮವಾರ ಬೆಳಗ್ಗೆ ಅಪಾರ್ಟ್ ಮೆಂಟ್ ನ ಎಲ್ಲರಿಗೂ ಶಾಕ್ ಕಾದಿತ್ತು. ನಳದಿಂದ ನೀರು ತೆಗೆಯಲು ನೋಡಿದರೆ ಸಾರಾಯಿ ಬರುತ್ತಿತ್ತು. ಇದರಿಂದ ಅಚ್ಚರಿಗೊಂಡ ಜನ ಬೀದಿಗೆ ಬಂದು ಕೋಲಾಹಲವೇ ಸೃಷ್ಟಿಯಾಗಿತ್ತು. ಜೊತೆಗೆ ಬಾವಿಯ ನೀರಿನಿಂದ ಸಾರಾಯಿ ಬರಲು ಹೇಗೆ ಸಾಧ್ಯ ಎನ್ನುವ ಅಚ್ಚರಿಗೆ ಕಾರಣವಾಗಿತ್ತು. ಆದರೆ ಆ ಬಳಿಕ ವಾಸ್ತವಾಂಶ ಏನೆನ್ನುವುದು ಬಯಲಾಗಿದೆ. ಈ ಎಲ್ಲ ಯಡವಟ್ಟುಗಳಿಗೂ ಅಬಕಾರಿ ಅಧಿಕಾರಿಗಳೇ ನೇರ ಕಾರಣವಾಗಿದ್ದರು. ಭಾರತದಲ್ಲೇ ಉತ್ಪಾದಿಸಿದ್ದ ವಿದೇಶಿ ಬ್ರಾಂಡ್ ಗಳ ಮದ್ಯವನ್ನು ಅಧಿಕಾರಿಗಳು ವಶಕ್ಕೆ ಪಡೆದುಕೊಂಡಿದ್ದರು. ಇದರಲ್ಲಿ ಒಟ್ಟು 450 ಪೆಟ್ಟಿಗೆ ಮದ್ಯವಿತ್ತು. ಆ ಮದ್ಯಗಳನ್ನು ಈ ಅಪಾರ್ಟ್ ಮೆಂಟ್ ನ ಸಮೀಪದ ಬಯಲು ಪ್ರದೇಶದಲ್ಲಿ ನಾಶಗೊಳಿಸಲಾಗಿತ್ತು. ಹೆಚ್ಚಿನ ಪ್ರಮಾಣದಲ್ಲಿದ್ದ ಮದ್ಯ ಬಾವಿಗೆ ಹರಿದು ನೀರಿನಲ್ಲಿ ಸೇರಿಕೊಂಡಿತ್ತು. ಇದರಿಂದಾಗಿ ಅಪಾರ್ಟ್ ಮೆಂಟ್ ಗೆ ಪೂರೈಕೆಯಾದ ನೀರಿನಲ್ಲಿ ಮದ್ಯ ಸೇರಿಕೊಂಡು ಇಷ್ಟೆಲ್ಲ ರಾದ್ಧಾಂತಕ್ಕೆ ಕಾರಣವಾಗಿದೆ.