ಕೆಸಿಎಫ್ ಹೆಸರಿನಲ್ಲಿ ಹಾರಿ ಬರುತ್ತಿದೆ ಉಕ್ಕಿನ ಹಕ್ಕಿಗಳು!! 

f

ಕೆಸಿಎಫ್ ಹೆಸರಿನಲ್ಲಿ ಹಾರಿ ಬರುತ್ತಿದೆ ಉಕ್ಕಿನ ಹಕ್ಕಿಗಳು!! 
ಅನಿವಾಸಿಗಳ ಆಶಾಕಿರಣವಾಗಿ KCF ಚಾರ್ಟೆಡ್ ಫ್ಲೈಟ್‌...

✍️ ಹಾಫಿಲ್ ಸುಫ್ಯಾನ್ ಸಖಾಫಿ ಕಾವಳಕಟ್ಟೆ 
(ಉಪಾಧ್ಯಕ್ಷರು ಎಸ್ಸೆಸ್ಸೆಫ್ ಕರ್ನಾಟಕ ರಾಜ್ಯ) 
 
COVID-19 ಸಂದರ್ಭದಲ್ಲಿ ಬಹುಶಃ ಅತ್ಯಂತ ಹೆಚ್ಚು ತೊಂದರೆಗೊಳಗಾದವರು ನಮ್ಮ ಅನಿವಾಸಿಗಳಾಗಿರಬಹುದು. ನಾವೆಲ್ಲಾ ನಮ್ಮ ಮನೆಗಳಲ್ಲಿ ಕುಟುಂಬದೊಂದಿಗೆ ಲಾಕ್‌ಡೌನ್ ಕಳೆದಾಗ ಅತ್ತ ಕೆಲಸವೂ ಇಲ್ಲ ಕುಟುಂಬದ ಸಾಮಿಪ್ಯವೂ ಇಲ್ಲ ಜೊತೆಗೆ ವೇತನವೂ ಇಲ್ಲದೆ ಗಲ್ಫ್ ರಾಷ್ಟ್ರಗಳ ಫ್ಲಾಟ್‌ಗಳಲ್ಲಿ ಬಂಧಿಯಾಗಿ ಕಾಲ ಕಳೆದವರು ಬಹುತೇಕ ನಮ್ಮ ಅನಿವಾಸಿಗಳು! 
ಆದರೆ ಆ ಸಂದರ್ಭದಲ್ಲೂ ಪ್ರತಿ ಫ್ಲಾಟ್‌ಗಳಿಗೆ ಆಹಾರ ಪೊಟ್ಟಣಗಳನ್ನು, ಸಾಮಾಗ್ರಿಗಳನ್ನು ತಲುಪಿಸಿ, ರೋಗಿಗಳನ್ನು ಆಸ್ಪತ್ರೆಗೆ ಸಾಗಿಸಿ,  ಬೇಕಾದ ಶುಶ್ರೂಷೆಯನ್ನೂ ಸಾಂತ್ವನವನ್ನೂ ನೀಡಿದ ನಮ್ಮ ಕೆಸಿಎಫ್ ಮಿತ್ರರು ಈಗ ಹಲವು ರಾಷ್ಟ್ರಗಳಿಂದ ತಂತಮ್ಮ ಊರಿಗೆ ತಲುಪಬೇಕಾದವರಿಗಾಗಿ ಚಾರ್ಟೆಡ್ ಫ್ಲೈಟ್‌ಗಳ ವ್ಯವಸ್ಥೆ ಮಾಡಿ ನೂರಾರು ಗರ್ಭಿಣಿಗಳನ್ನು, ರೋಗಿಗಳನ್ನು ಹಾಗೂ ತುರ್ತಾಗಿ ಊರಿಗೆ ತಲುಪಬೇಕಾದ ಇನ್ನಿತರರನ್ನು ಧರ್ಮ ಜಾತಿಯನ್ನು ನೋಡದೆ ಸುರಕ್ಷಿತವಾಗಿ ಮನೆಗೆ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ. 
ನಿಜಕ್ಕೂ ಒಂದು ಫ್ಲೈಟ್ ಚಾರ್ಟೆಡ್ ಮಾಡಿ ಅದರಲ್ಲಿ ಹೋಗಬೇಕಾದ ಜನರನ್ನು ಆಯ್ಕೆ ಮಾಡಿ ಅವರಿಗೆ ಬೇಕಾದ ಸುರಕ್ಷಾ ವ್ಯವಸ್ಥೆಗಳನ್ನು ಕಲ್ಪಿಸಿ ಕಳುಹಿಸಿ ಕೊಡುವುದು ಅಷ್ಟೇನೂ ಸುಲಭದ ಸಂಗತಿಯಲ್ಲ. ಹಲವಾರು ನಮ್ಮ ನಾಯಕರು ಕಾರ್ಯಕರ್ತರು ಇದಕ್ಕಾಗಿ ರಾತ್ರಿ-ಹಗಲೆನ್ನದೆ ನಿದ್ದೆ ಬಿಟ್ಟು ಓಡಾಡಿದ್ದಾರೆ, ಕಷ್ಟಪಟ್ಟಿದ್ದಾರೆ, ಹಲವು ಅಧಿಕಾರಿಗಳನ್ನು ಕಂಡು ಅದಕ್ಕೆ ಬೇಕಾದ ವ್ಯವಸ್ಥೆ ಸುಸೂತ್ರವಾಗಿ ನಡೆಯಲು ಪಾಡು ಪಟ್ಟಿದ್ದಾರೆ. ಇತ್ತೀಚೆಗೆ ಕೆಲವು ದಿನಗಳಿಂದ ಯಾವುದೇ ಕೆಸಿಎಫ್ ನಾಯಕರೊಂದಿಗೆ ಯಾವುದೇ ವಿಷಯದಲ್ಲಿ ಮಾತನಾಡಿದಾಗಲೂ ಇದರ ಬಗ್ಗೆಯೇ ಅವರು ಫುಲ್ ಬ್ಯುಸಿಯಾಗಿದ್ದರು! ಅಲ್ಲಾಹು ಎಲ್ಲವನ್ನೂ ಖಬೂಲ್ ಮಾಡಲಿ-ಆಮೀನ್ 
ಯುಎಇ, ಸೌದಿ ಅರೇಬಿಯಾ, ಕತಾರ್ ರಾಷ್ಟ್ರಗಳಿಂದ ಈಗಾಗಲೇ ವಿಮಾನಗಳು ಬಂದು ತಲುಪಿದ್ದು ಬಹ್ರೈನ್, ಒಮಾನ್, ಕುವೈತ್, ಯುಎಇ ಸಹಿತ ಇನ್ನಷ್ಟು ರಾಷ್ಟ್ರಗಳ ಕೆಸಿಎಫ್ ಚಾರ್ಟೆಡ್ ಫ್ಲೈಟ್‌ಗಳು ನಮ್ಮೂರಿಗೆ ಬಂದಿಳಿಯಲಿದೆ.
ಈ ನಮ್ಮ ಕೆಸಿಎಫ್ ನಾಯಕರು ವ್ಯವಸ್ಥೆ ಮಾಡಿದ ಚಾರ್ಟೆಡ್ ಫ್ಲೈಟ್‌ಗಳ ಮೂಲಕ ಬಂದವರಲ್ಲಿ ಹಲವು ಅನ್ಯ ಧರ್ಮೀಯ ಮಿತ್ರರು ಕೂಡ ತಮಗೆ ಸುಗಮವಾಗಿ ಊರಿಗೆ ತಲುಪಲು ವ್ಯವಸ್ಥೆ ಮಾಡಿ ಕೊಟ್ಟ ಕೆಸಿಎಫ್ ಕಾರ್ಯಾಚರಣೆ ಬಗ್ಗೆ ಮನತುಂಬಿ ಪ್ರಶಂಸೆಯ ಮಾತುಗಳನ್ನಾಡಿದ್ದು ನಾವು ಕೇಳಿದ್ದೇವೆ. ಅಲ್ ಹಂದುಲಿಲ್ಲಾಹ್... 
ಕೇವಲ ಏಳೆಂಟು ವರ್ಷಗಳ ಹಿಂದೆ ನಮ್ಮ ಅನಿವಾಸಿ ಮಿತ್ರರು ಕಟ್ಟಿ ಬೆಳೆಸಿದ ಕೆಸಿಎಫ್ ಈಗ ನಮ್ಮ ನಾಡಿನ ಸಂಸ್ಥೆ ಸಮುಚ್ಚಯಗಳಿಗೆ, ಸಂಘಟನಾ ಚಟುವಟಿಕೆಗಳಿಗೆ, ಉತ್ತರ ಕರ್ನಾಟಕದ ದಅವಾ ಕಾರ್ಯಾಚರಣೆಗಳಿಗೆ ಬೆನ್ನೆಲುಬಾಗಿ ಅನಿವಾಸಿ ಮಿತ್ರರ ಆಶಾಕಿರಣವಾಗಿ ಹೆಮ್ಮೆ ಯಾಗಿ ಹೆಮ್ಮರವಾಗಿ ಬೆಳೆದು ನಿಂತಿದೆ!! ತಂತಮ್ಮ ಕುಟುಂಬಗಳ ಭಾರಹೊತ್ತು ದೂರದ ಪರದೇಶಕ್ಕೆ ಹಾರಿದ ನಮ್ಮೂರಿನ  ನಮ್ಮವರು ದಿನವಿಡೀ ದುಡಿದು ಕೊನೆಗೆ ಸಿಕ್ಕುವ ಅಷ್ಟಿಷ್ಟು ಸಮಯಗಳನ್ನು ಸಂಪೂರ್ಣವಾಗಿ ಅಲ್ಲಾಹನ ದೀನಿನ ಖಿದ್‌ಮತ್‌ಗಾಗಿ, ಈ ಉಮ್ಮತ್ತಿನ ಸೇವೆಗಾಗಿ ಮೀಸಲಿಡುತ್ತಿರುವುದು ನಿಜಕ್ಕೂ ಗ್ರೇಟ್!! ಅಲ್ಲಾಹು ನಮ್ಮ ಅನಿವಾಸಿ ಮಿತ್ರರ ಎಲ್ಲಾ ಸಂಕಷ್ಟಗಳನ್ನು ದೂರಮಾಡಿ ಸಂತೃಪ್ತಿಯಿಂದ ಜೀವಿಸಲು ಅವರಿಗೂ ಕುಟುಂಬಕ್ಕೂ ನಮಗೂ ತೌಫೀಖ್ ನೀಡಲಿ-ಆಮೀನ್